Талас облусунун аймагында жааган калың кардан улам үзүлгөн электр зымдары оңдолууда. Бул тууралуу Өзгөчө кырдаалдар министрлигинен кабарлашты.
Маалыматка ылайык, 14-октябрда калыңдыгы 15-20 см болгон кардан Манас, Кара-Буура райондорундагы электр зымдары үзүлүп, бир катар айылдар жарыксыз калган. Кечээ электр зымдарын калыбына келтирүү иштери жүрүп, Кара-Буура районунда электр энергиясы 80 пайыз, Манас районунда 60 пайыз калыбына келтирилди. Учурда бул иштер уланууда.
Өзгөчө кырдаалдар министрлиги бүгүн өлкөнүн бир катар аймактарында үшүк жүрүшү мүмкүн экенин эскертти. (BkA)
