Түркиянын көбүнесе күрттөр байырлаган Диярбакыр шаарындагы унаа жардыруусунан сегиз киши мүрт кетип, жүздөй адам жаракат алды. Түркиянын премьер-министри Бинали Йылдырым жардыруу үчүн күрт жоочуларын айыптады.
Окуя 4-ноябрдын таңында полиция имаратынын жанында болгон. Бул жардыруу күрттөрдүн Элдик демократиялык партиясынын 11 депутаты камакка алынгандан кийин болду. Коопсуздук күчтөрү бул депутаттар террорчулукка каршы иликтөө учурунда кармалганын билдирди.
