Украина баш прокурору Юрий Луценко өлкөнүн мурунку президенти Виктор Януковичке мамлекетке чыккынчылык кылууга жана өлкөнүн бүтүндүгүнө бүлүк салууга шектүү катары айып койду. Бул тууралуу Башкы көзөмөл органдын жетекчиси 28-ноябрда билдирди.
Бозгундагы мурдагы мамлекет башчы Виктор Янукович Киевдеги соттук териштирүүдө видео байланыш аркылуу көрсөтмө берип, үч жыл мурдагы “Евромайдан” окуяларында демонстранттарды атууга буйрук бербегенин билдирди. Бул соттук жараянда 2014-жылы митингге чыккандарга ок аткан деп айыпталган беш полиция кызматкеринин иши каралып жатат.
2013-жылдын соңунда башталган “Евромайдан” демонстрациялары маалында жүздөн ашык адам окко учкан. Элдик толкундоолордон улам Янукович Орусияга качууга аргасыз болгон. Ал “Евромайдан” окуяларынан бери биринчи жолу сотто көрсөтмө берди.
