ӨКМ билдиргендей, Бишкек-Ош жолундагы "Сосновка" постунда 250дөй машине токтоп турат. Алардын жүзгө чукулу оор жүк ташуучу автоунаалар. Бул жерде айдоочулар, жүргүнчүлөр үчүн жылытуу жайлары ачылды. Талас жана Жалал-Абад облустарында да мындай жайлар ачылды. 23-декабрда Бишкек-Ош жолуна төрт жолу кар көчкү түштү. Аны тазалоо учурунда жол маал-маалы менен жабылып, элге кыйынчылык жаралууда. Аталган министрлик көчкү коркунучу бар аймактардан жүрбөй турууга жарандарды чакырууда.
Карга байланыштуу тоолуу райондордо, Бишкек-Ош канжолундагы ашууларда, Мырзаке-Кара-Кулжа-Алайкуу, Ала-Бука-Каныш-Кыя, Каныш-Кыя-Кызыл-Адыр, Красная-Горка-Ак-Таш, Нарын-Казарман жолунун Кара-Көө ашуусунда, Каракол-Эңилчек каттамындагы Чоң-Ашууда, Барскон-Ак-Шыйрак каттамынын Сары-Мойнок жана Сөөк ашууларында кар көчкү коркунучу сакталууда.
Жолдор тайгак болуп, муз каптап турат. Айдоочулар жолдо баратып 500 метрден кем эмес аралыкты сакташы зарыл. (NT)
