Президент Алмазбек Атамбаев Түндүк-түштүк жолунун 159-183-чакырымдарын курууга Ислам өнүгүү банкы менен Кыргызстандын ортосундагы кредиттик макулдашууну күчүнө киргизген мыйзамга кол койду. Бул тууралуу өлкө башчынын маалымат кызматынан кабарлашты. Аталган мыйзамды Жогорку Кеңеш быйыл 24-ноябрда кабыл алган.
Ага ылайык, Түндүк-түштүк жолунунун 24 чакырымын курууга Ислам өнүктүрүү банкы 12 миллион доллар үстөксүз насыя берет. Насыя 25 жыл ичинде төлөнөт.
Түндүк-түштүк жаңы жолунун курулушу 2014-жылы башталган. Жаңы жолдун жалпы узундугу 433 чакырымды түзөт. Балыкчы жана Жалал-Абад шаарларын бириктирген жол Кочкор - Чаек – Көкөмерен - Казарман аркылуу өтөт. Жолду толугу менен бүтүрүүнү кытайлык компания моюнуна алган. Долбоорго ылайык, курулушка жалпысынан 850 миллион доллар талап кылынат. Анын алгачкы бөлүгүн курууга кытайлык “Экспорт-Импорт” банкы 400 миллион АКШ долларды насыяга берген.(BkA)
