Өзгөчө кырдаалдар министрлиги бөлүп берген унаага салынган Рахмановдун жасаты жетекчилердин жана жакын туугандарынын коштоосунда Бишкектен Жалал-Абадка чыгып кетти. Бул тууралуу Өзгөчө кырдаалдар министрлигинин маалымат кызматы билдирди.
29 жаштагы Сагынбек Рахманов 16-январдагы учак кырсыгында оор жаракат алып, денесинин 45% күйүп калган. Ошол күндөн бери ооруканада оор абалда жаткан Сагынбек 22-январда саат 12:30да көз жумду.
Учак кырсыгында Сагынбек Рахмановдун сегиз айлык боюнда бар келинчеги, алты жана үч жаштагы эки наристеси каза тапкан эле. Өткөн жумада бул үй-бүлөнүн сөөктөрү Ноокенде, туулган жеринде жерге берилген.
Сагынбек Рахманов менен Венера Дүйшеева 2010-жылы баш кошкон. Үчүнчү перзенти бир айдан кийин төрөлмөк. Төрөлө элек үчүнчү наристесин энесинин курсагынан алып, Аяна деген ысым ыйгарып, энесинин жанына коюшкан. (ZKo)
