Сириядагы америкалык аба соккуларынын натыйжасында “Ал-Каиданын” 11 командири жок кылынды. Бул тууралуу 8-февралда АКШ Коргоо министрлиги кабарлады.
4-февралда өлтүрүлгөн Абу Хани ал-Масри террордук уюмдун маркум лидери Усама бен-Ладен менен да, азыркы лидери Айман ал-Завахири менен да байланышта болгон. Ал 1980-90-жылдары “Ал-Каиданын” Ооганстандагы машыгуу лагерлерин түзүп иштеткен.
Масри “адамдарды азгырып, идеологияны сиңирип, машыктырып, натыйжада миңдеген террорчуларды чыгарган. Алар кийин аймакка жана дүйнөгө тараган” делет мекеменин билдирүүсүндө.
Ал эми калган он "алкаидачы" 3-февралда Идлибге жакын жерде жолугушуу үчүн колдонулган имаратка жасалган чабуулда жок кылынган.
“Бул аба соккулары “Ал-Каиданын" тышкы, АКШга жана биздин дүйнөдөгү кызыкчылыктарыбызга пландаган чабуулдарын үзгүлтүккө учуратат”, деди Пентагондун расмий өкүлү Жефф Дэвис.
