12-февралдагы Федералдык жыйында Германия президенттигине Франк-Вальтер Штайнмайер биринчи турда шайланды. Аны ландтаг жана бундестагдын 1239 депутатынын 931и колдоду. Бул жеңиш үчүн зарыл болгондон 300 добушка көп.
61 жаштагы Штайнмайерди канцлер Ангела Меркель жетектеген Христиан-демократиялык союз менен Германия социал-демократиялык партиясынан куралган блок президенттикке көрсөткөн. Штайнмайер буга чейин өлкөнүн тышкы иштер министрлигин жетектеген.
Ишке кирүү аземи 19-мартка белгиленген. Мурдагы президент 77 жаштагы Йоахим Гаук болчу.
Германияда бийлик ыйгарым укуктарынын дээрлик баары канцлерде болгону менен президенттик кызмат моралдык бийик даража катары саналат.
