Орусия Москва менен Вашингтон ортосунда “диалог жүргүзүү идеясын бек тутунган” АКШнын кайсы гана элчиси болбосун кабыл алат. Бул тууралуу орус президентинин маалымат катчысы Дмитрий Песков 9-мартта билдирди.
Аз илгерээк АКШнын Юта штатынын мурунку губернатору Жон Хантсман Ак үйдүн Орусияга элчи болуу сунушун кабыл алганы кабарланган.
56 жаштагы Хантсман 1992-1993-жылдары Сингапурдагы, 2009-2011-жылдары Кытайдагы Кошмо Штаттардын элчиси болгон. Өткөн жылкы шайлоо кампаниясы учурунда Трампты сындагандардын бири.
АКШ президенти Дональд Трамп Украина, Сирия, хакердик чабуулга байланыштуу чыңалган Вашингтон-Москва алакасын калыбына келтирерин айтып келет.
