Санкт-Петербург соту террорчулукка шектелип кармалган сегиз орусиялык, өзбекстандык жана кыргызстандык жарандарды июль айынын башына чейин тергөө абагында кармоо чечимин чыгарды.
Кармалгандар 2015-жылдын ноябрь айынан бери "Ислам мамлекети" жана "Ал-Нусра" сыяктуу террорчул уюмдарга жарандарды азгырган деп шектелүүдө. Тергөөнүн маалыматы боюнча, бул адамдар Орусиянын Сириядагы аскердик операцияларында мусулмандардын өмүрү кыйылганы тууралуу маалыматтарды WhatsApp жана Viber сыяктуу маалымат алмашуу түйүндөрүндө талкуулап келишкен.
5-апрелде кармалган шектүүлөрдүн аты ачык жарыяланган жок.
6-апрелде Петербургда апта башында метродогу жардырууну уюштурган адамга көмөктөштү делген кишилер да кармалган.
Санкт-Петербургда 3-апрелдеги жардыруу баш-аягы 14 адамдын өмүрүн алды.
