Түркмөнстандын президенти Гурбангулы Бердымухамедовдун “Алга, алга жана алга, мекеним, Түркмөнстан!” деген чыгармасы Азиада-2017нин расмий гимни болуп тандалды.
Мамлекеттик маалымат каражаттары жазгандай, чыгарма 8-апрелде өткөн жыйында каралып, ага катышкандардын баары президенттин өзү сунуштаган бул демилгени бир добуштан колдошту.
Өлкө башчысы чыгармасын 7-апрелде Аваза курорттук аймагында өткөн концерт маалында эл алдында аткарып, сунуш киргизген.
Мурдараак быйыл Ашхабадда өтө турган 5-Азия оюндарынын гимнине сынак жарыялынганы маалымдалган. Кийин бул тууралуу эч кандай кабар чыккан жок.
2006-жылы бийликке келген 59 жаштагы Гурбангулы Бердымухамедов алгачкы жолу өз өнөрүн 2010-жылы эл алдына тартуулап, балдар иш-чарасында аккордеондо ойноп берген. Андан бери ар кандай концерттерде ырдап, гитарада ойноп, атургай ди-джейлик өнөрүн да көрсөтүп жүрөт.
Медициналык илимдердин кандидаты, ар кырдуу талант Бердымухамедов 40тай китептин автору.
2010-жылы The Foreign Policy журналы Бердымухамедовду дүйнөдөгү 23 диктатордун катарына кошкон.
Facebook шеринеси