12-апрелде Германиянын тышкы иштер министри Зигмар Габриэль Сербия-Косово ортосунда өрчүп бараткан чыңалууну талкуулоо үчүн аталган мамлекеттерге барат.
- Өткөн убактагы айрым жаралар дале терең экенин жана ал чыңалууну жаратып жатканын көрүп жатабыз, - деди Габриэль Белградга жөнөөрдүн алдында.
Көбүнесе этникалык албандар жашаган Косово 1998-99-жылкы согуш учурунда Сербиядан бөлүнүп, 2008-жылы көз карандысыздыгын жарыялаган. Аны 114 өлкө тааныйт. Белград тааныган эмес.
Ошондон бери чыңалуу жазылбай келет. Азыр Сербия Евробиримдикке талапкер, ал эми Косово потенциалдуу талапкер макамында.
Габриэль 16-апрелде бара турган Албания, Македония дагы талапкер. Босния потенциалдуу талапкер.
- Кесиптештеримди ишендирип кетейин - эгер сиздер бөлүнүү менен сенектиктин ордуна реформаларды тандасаңыздар Евробиримдикке жол ачык, - деди немис министри.
