Бүгүн Бишкектин Биринчи Май райондук сотунда "Бир дүйнө-Кыргызстан" укук коргоо кыймылынын арызы боюнча сот УКМК өкүлү келбей калганына байланыштуу өткөн жок. Бул тууралуу аталган уюмдан кабарлашты.
Быйыл 24-январда Улуттук коопсуздук комитети Ошто "хизбутчу" деп кармалган жарандын үйүнөн өлкөдөгү конституциялык түзүлүштү кулатууга чакырган дисктер менен катар "Бир дүйнө-Кыргызстандын" "Өз укугуңду коргой бил" деген китепчелери табылганын, "тергөөдөгү адамды кармоо маалында уюмдун өкүлдөрү элди чогултуп, чыр чыгарууга аракет кылганын" маалымдаган пресс-релиз тараткан. УКМКнын маалымат катчысы Рахат Сулайманов "тергөө иштерине тоскоолдук жаратуу" деген негизде кылмыш иш козгоо маселеси каралып жатканын айткан.
13-февралда "Бир дүйнө-Кыргызстан" жогорудагы пресс-релизде келтирилген маалыматтар уюмдун кадыр-баркына шек келтирерин айтып сотко кайрылган.
Кийинки соттук отурум 4-майга белгиленди.
Укук коргоочулар соттук териштирүүнүн создугушу, УКМК өкүлүнүн келбей калышы сотко карата сыйлабастык экенин айтууда, атайын кызмат бул билдирүү боюнча комментарий бере элек. (RK)
