Оштун Өзгөн районундагы Аюу-Сай айылында көчкү басып калган 24 кишинин жетөөнүн сөөгү табылды. Өзгөчө кырдаалдар министрлигинин басма сөз кызматы 3-майда 10 жана 14 жаштагы кыздардын денеси топурак астынан чыгарылганын "Азаттык" радиосуна билдирди.
29-апрелде аталган кыштакта тоонун боорунан көлөмү 200 миң метр куб жер көчкү түшүп, жети үйдөгү 24 адамды басып калган. Алардын биринин сөөгү 30-апрелде, экөө 2-майда табылган.
Издөө иштеринде кыйынчылык жаралгандыктан Аалымдар кеңеши кырсык болгон жерди мүрзөгө айлантып, казуу иштерин токтотуу боюнча фатва чыгарган. Бирок элдин суранычы менен издөө иштери уланып жатат. (SE)
Facebook шеринеси