Ысык-Көлдө 6-майда туристтик мезгилдин расмий ачылышы болот. Бул тууралуу өкмөттүн облустагы өкүлчүлүгүнүн басма сөз кызматы билдирди.
Маалыматка караганда, ачылыш азем быйыл эки күнгө созулуп, 6-7-майда Бактуу-Долоноту айылындагы ат майданда өтөт.
Иш чара "ITF-Ысык-Көл" жармаңкеси менен коштолуп, туристтик компаниялар, пансионаттар, эс алуучу жайлар өздөрүн тааныштырмакчы. Иш-чара жергиликтүү ырчы-чоорчулардын концерти менен аяктайт.
Жайкы туристтик мезгил былтыр да 7-майда ачылган. Облустук бийликтин маалыматы боюнча былтыр Ысык-Көлгө 750 миң турист келген.
Туризм департаменти билдиргендей, жалпысынан Кыргызстанга былтыр өлкөнү көргөнү, эс алганы келген туристтердин саны 3 млн. 800 миңден ашкан. (AsM/NT)
