Баткен облусунун Тажикстан менен чектеш аймакта жайгашкан Чоң-Талаа айылынын тургундары үй курууга уруксат берилбей жатканына нааразылык билдирип жатышат.
Айыл башчысы Асан Жороевдин “Азаттык” радиосуна билдиришинче, кыштакта буга чейин 136 үй-бүлөгө үй-жай үчүн чек берилген. Бүгүнкү күндө алардын жарымы көчүүгө тийиш болчу. Бирок чек арага 300 метрден жакын жайгашкан жерге турак жай салууга болбойт деген жүйө менен 50дөн ашык үй-бүлө жер тилкесин ала элек:
- 2013-жылы чек арага жакын жерден 27 гектар жер үй-жайга берилип, эми ал эки өлкөнүн 2008-жылы “Чек арага жакын жерлерде курулушту жүргүзбөө” келишимине ылайык токтотулуп жатат. Башка жакта жер жок.
Айылдыктар жер маселесин чечүү өтүнүчү менен акыйкатчыга, укук коргоочуларга жана бийлик өкүлдөрүнө да кайрылышкан. (JsA)
