Казакстандын Астана шаарында өтүп жаткан көк бөрүнүн казакча түрү - көкпар боюнча дүйнө чемпиондугунун тайпалык тандоо оюндарынын 4-турунда Кыргызстандын көк бөрүчүлөрү Тажикстан командасын 15:2 эсебинде жеңип алды. Оюн Астана шаарындагы "Казанат" ат майданында өттү.
Оюндун биринчи таймы 9:0 эсебинде аяктады. Экинчи таймда кыргыз тарап алты улакты атаандаштарынын аймагына таштаса, тажик тарап эки голдун ээси болушту.
Аталган чемпионат 21-августта башталган. Ага 11 курама команда катышып, эки тайпага бөлүнүп ойноп жатышат.
Буга чейин кыргыз көк бөрүчүлөрү Монголияны 4:0, Өзбекстанды 11:2, Түркияны 13:3 эсебинде жеңип алган. Эртең (25-августта) тайпалык тандоо оюндарынын акыркы турунда кыргыз көк бөрүчүлөрү АКШ курама командасы менен беттешет.
Финалдык оюн 27-августта болот. (ECh).
