25-августта Казакстандын Астана шаарында өтүп жаткан көк бөрүнүн казакча түрү - көкпар боюнча дүйнө чемпиондугунда тайпалык тандоо оюндарынын акыркы 5-турундагы таймаштар өттү.
Кыргызстандын көк бөрүчүлөрү АКШ командасы менен ойноп, 11:6 эсебинде жеңишке жетти.
Ушуну менен Кыргызстандын курама командасы тайпалык оюндарда беш жолу жеңишти камсыздап, турнирдик таблицада А тобунда көч башын ишенимдүү жетектеп турат.
Буга чейин Кыргызстандын оюнчулары Монголияны 4:0, Өзбекстанды 11:2, Түркияны 13:3, Тажикстанды 15:2 эсебинде жеңип алган.
Ишемби күнү, 26-августта, көк бөрүчү курама командалар эс алышат.
27-август күнү финалдык таймаштар өтөт. Баш байге үчүн Кыргызстан менен Казакстандын командалары ойнойт. Оюн саат 11:00де башталат.
Беттештин жүрүшүн түз эфирде КТРК жана КТРК Спорт телеканалдары Full HD форматта түз алып көрсөтөт. Бул тууралуу 24-августта Коомдук телерадиоберүү корпорациясынын башкы директору Илим Карыпбеков Фейсбуктагы баракчасы аркылуу маалымдаган.
Мелдештин байге фонду 18 миллион теңге (3 млн 657 миң сом).
1-орун үчүн 10 млн теңге (2 млн 32 миң сом), 2-орунга 5 млн теңге (1 млн 16 миң сом), 3-орунга 3 млн теңге (609 миң сом) ыйгарылат.
Бул көкпар (көк бөрү) боюнча Биринчи дүйнөлүк чемпиондук Астана шаарындагы Эл аралык "Экспо-2017" көргөзмөсүнүн алкагында уюштурулууда.
(ECh)
