Фейсбук орусиялык колдонуучуларынын персоналдык маалыматтарын көчүрүп келбесе, эмки жылдан тарта Орусияда иши чектелиши ыктымал. Бул тууралуу "Интерфакс" агенттигине Роскомнадзордун жетекчиси Александр Жаров билдирди.
Ал ошондой эле 2017-жылы бул түйүндү текшеришпесин, мыйзамга шайкештик талабы эмки жылдан тарта коюларын белгиледи.
Персоналдык маалыматтар боюнча мыйзам Орусияда 2015-жылы кабыл алынган. Аны бузган онлайн-ресурстарга көзөмөл комитети чек кое алат. Маселен, 2016-жылы чет элдик ири LinkedIn социалдык сайтына бөгөт коюлган.
Жаровдун талабы Фейсбуктун ээси Марк Цукербергдин билдирүүсүнөн аз өтпөй айтылды. 21-сентябрда Цукерберг Орусиянын АКШдагы президенттик шайлоого ыктымал кийлигишүүсүн иликтөөнү колдоорун билдирген. Буга улай сайтына АКШ шайлоосуна оро-пара орусиялыктар чыгарган 3 миңдей жарнаманы Конгресске жана күч түзүмдөрүнө өткөрүп берерин жарыялаган.
