Перулук илимпоздор 4,5 миң жыл илгери жашаган аялдын үч өлчөмдүү портретин жасашты. Анын мумиясы 2016-жылы өлкө түндүгүндө балыкчылардын Асперо деген кыштагында табылган.
Ал байыркы ак сөөк аял азыркы Карал шаарына жакын жерде жашачу экен.
"Сүрөттү тартууга 2 айдай убакыт кетти. Баш сөөгүнүн жардамы менен бетинин өзгөчөлүктөрүн аныктай алдык. Ал үчүн ошол аймактагы адамдарды изилдеп чыкканбыз. Эң кыйыны - баш сөөктүн өзүн калыбына келтирүү болду", - деди бейненин дизайнерлеринин бири Сисеро Мораэс.
Окумуштуулар аял өлгөндө 40-50 жаштарда болчу деген тыянакка келишкен. Анын мүрзөсүндө "аркы дүйнөдө керек болот" деген түрдүү буюм-тайымдар табылган. Көйнөгүндө болсо 4 кооз төйнөгүчү тагылыптыр.
Мындан улам тарыхчылар ал аял теги жагынан бай бүлөдөн, демек, социалдык макамы жогорку катмардан болчу дешет.
Карал жергеси Америкадагы эң байыркы цивилизациялардын биринин чордону болгон. Ал жердеги археологиялык жай ЮНЕСКОнун мурастар тизмесине камтылган.
