Өзгөчө кырдаалдар министрлигинин Гидрометеорология агенттиги 18-октябрдан 19-октябрга караган түнү Таластын Кара-Буура районунда ылдамдыгы секундасына 25 метрге чейин жеткен катуу шамал катталганын аныктаган.
Бул катуу шамал райондун Жоон-Дөбө айылында Р. Осмонов атындагы орто мектебинин жана Кайнар айылынын Керимбай атындагы орто мектебинин чатырларынан шыйпырларын учуруп кеткен.
Бул тууралуу ӨКМдин маалымат кызматы “Азаттыкка” билдирди. Маалыматта Ак-Чий, Кайнар айылдарында да бир нече үйдүн чатыры жабыркаганы айтылат. ӨКМдин Кара-Буура райондук бөлүмүнүн башчысы жана жергиликтүү жарандык коргонуу комиссиясы жеринде изилдөө иш-чараларын жүргүзүштү.
Катуу шамалдын кесепетин жоюу жана имараттарды калыбына келтирүү иш-чараларын жүргүзүү жергиликтүү бийликке тапшырылды.
Кечээ, 18-октябрь таңга маал катталган катуу шамалдан улам Бишкектин, Чүйдүн жана Таластын бир катар аймактарында электр энергиясын берүү үзгүлтүккө учураган. (ErN)