Ооганстандын түндүгүндө жоочулардын кол салуусунан кеминде 13 полициячы мерт болду. Кундуз провинциясынын полиция башчысы Абдул Хамидинин айтымында, Хан-Абад районундагы көзөмөл-өткөрүү бекетине 29-октябрда чабуул коюлган.
Ханабаддын акими Аятулла Амири чабуулда бир гана полициячы аман калганын билдирди.
Калаба үчүн “Талибан” экстремисттик кыймылы жоопкерчилик алды.
19-октябрда талиптер Кандагарда 43 аскерди өлтүрүп кетишкен. Ушуну менен алар быйыл өкмөттүк аскерлерге бир нече ирет кандуу чабуул жасашты. 2014-жылы өлкөдөн НАТОнун басымдуу күчтөрү чыгып кеткенден бери жоочулар менен күрөштөгү негизги милдет жергиликтүү өкмөткө артылган.
