Ташкентте өтүп жаткан КМШ өлкөлөрүнүн өкмөт башчыларынын жыйынында Кыргызстан “Эркин соода жүргүзүү” келишиминин аткарылышы жөнүндөгү документке өзгөчө пикир менен кол койду.
Келишимге кол коюу алдында премьер-министр Сапар Исаков документтин 7-пунктун Казакстан бузуп жатканын билдирди:
"Анда КМШ өлкөлөрүнүн товарларын ыңгайлуу транзит аркылуу жеткирүү каралган. Бирок Казакстан 10-октябрдан бери келишимдин түз бузуп жатканын көрүүдөбүз. Ушундан улам Кыргызстан эркин соода жүргүзүү боюнча 2011-жылы кабыл алынган келишим толук иштебей жатат”.
Бүгүн Ташкенттеги КМШ өлкөлөрүнүн өкмөт башчыларынын жыйынында 2011-жылы кабыл алынган “Эркин соода жүргүзүү” келишими ишке ашып жатканы боюнча маалымат берилип, соңунда премьер-министрлер бул документке кол коюшту.
Кыргызстан өзгөчө пикир менен макул болду. Мындан башка өкмөт башчылар транспорт, машина куруу, коопсуздук, бажы жаатында документтерге кол койду. (SDz)
