Президент Алмазбек Атамбаев Кыргызстанга иш сапары менен келген Өзбекстандын тышкы иштер министри Абдулазиз Камиловду кабыл алды. 5-ноябрда болгон жолугушууда кыргыз-өзбек мамилесиндеги маанилүү маселелер тууралуу сөз болду. Анда тараптар эки өлкө башчыларынын мамлекеттик иш сапарлары учурунда жетишилген келишимдерди ишке ашыруу зарылчылыгын белгилешти. Ошондой эле транспорт, туризм жана соода-экономикалык тармакта биргелешкен долбоорлорду ишке ашырууну да сүйлөштү. Бул тууралуу президенттин маалымат кызматынан кабарлашты.
Өзбекстандын тышкы иштер министри Абдулазиз Камилов Кыргызстанга 4-ноябрда иш сапар менен келген. Ал буга чейин Кыргызстандын тышкы иштер министри Эрлан Абдылдаев менен жолугушкан.
Өзбекстандын президенти Шавкат Мирзиёев 5-6-сентябрда Бишкекке мамлекеттик сапар менен келип кеткенден кийин эки өлкө ортосундагы буга чейин жабык турган чек ара бекеттери ачылган.
Кыргызстандын президенти Алмазбек Атамбаев Ташкентке 5-6-октябрь күндөрү мамлекеттик сапар менен барган. (ZKo)
