Линктер

шейшемби, 21-август, 2018 Бишкек убактысы 07:09

Конго Демократиялык Республикасында БУУнун 14 өкүлү өлтүрүлдү


БУУнун маалымат катчысынын орун басары Фархан Хак.

Конго Демократиялык Республикасындагы Улуттар Уюмунун базасына жасалган кол салуудан уюмдун бейпилдик күчтөрүнүн 14 өкүлү мерт кетип, элүүдөн ашууну жаракат алды. Бул тууралуу Улуттар Уюмунун өкүлү 8-декабрда билдирди. Бул Улуттар Уюмунун өкүлдөрүнө жасалган бир топ жылдардан берки эң катуу чабуул болуп калды.

БУУнун маалымат катчысынын орун басары Фархан Хак билдиргендей, жабыркагандардын көбү Танзания мамлекетинен болушкан. Ал ошондой эле кол салгандар коңшу Угандада отурукташкан "Конголук жоокерлер" деген топтун жоочулары экенин жана алардын бешөө да жок кылынганын кошумчалады.

Уюмдун баш катчысынын орун басары Жан-Пьер Лакруа мерт кеткендердин жакындарына "Твиттерге" жазган билдирүүсүндө көңүл айтты.

Кол салуу өлкө чыгышындагы Түндүк Киву провинциясында жайгашкан Бени шаарынан 45 чакырым алыстыкта орун алган Улуттар Уюмунун базасына жасалган.

МОНУСКО деп аталган Конго Демократиялык Республикасындагы кырдаалды турукташтыруу боюнча Улуттар Уюмунун миссиясы 1999-жылы түзүлгөн. Анын сайтындагы маалыматка караганда, бул өлкөдөгү миссиянын курамында 21 миңден ашуун киши бар. Алардын катарына аскерлер, полициячылар жана жай тургундар кирет.

XS
SM
MD
LG