24-25-январь күндөрү Ташкент шаарында Кыргызстандын, Кытайдын жана Өзбекстандын транспорт министрликтеринин өкүлдөрү жолугушат. Анда үч өлкөнүн өкмөттөрүнүн ортосунда 1998-жылы 19-февралда кол коюлган, эл аралык автоунаа кыймылы боюнча макулдашууну ишке ашыруу боюнча маселе каралат.
Анын алдында бул маселе эки тараптуу да талкууланары күтүлүп жатканын Өзбекстандын Тышкы иштер министрлиги маалымдады.
Былтыр 6-сентябрда Кыргызстан менен Өзбекстандын президенттери Анжиян-Ош-Кашкар багытында транзиттик автоунаа кыймылы тууралуу макулдашууга кол коюшкан. Макулдашуу былтыр 30-декабрда күчүнө кирген. (ZKo)
