Каракол шаардык прокуратурасы калаадагы мамлекеттик “Ишкер” микрокредиттик агенттигинин жооптуу кызматкерлерине Кылмыш-жаза кодексинин 304-беренесинин ("Кызмат абалынан кыянаттык менен пайдалануу") негизинде кылмыш ишин козгоду. Бул тууралуу Башкы прокуратурадан кабарлашты.
Маалыматтарга караганда, Эмгек жана социалдык өнүгүү министрлигине караштуу Ысык-Көлдөгү “Ишкер” микрокредиттик агенттигине мамлекеттен жарандарга насыя берүү үчүн которулган 1 млн. 545 миң 620 сомду мекеменин кызматкерлери өздөрүнө маяна катары жаздырып алганы белгилүү болгон. Кызматкерлер бул сумманы 2008-2016-жылдар аралыгында колдонушкан. Ал эми ишкананын жобосуна ылайык, агенттиктин кызматкерлери насыяга берилген акчанын туумун гана алышы керек эле.
Ишти Ысык-Көл облустук прокуратурасы тергеп жатат.
“Ишкер” микрокредиттик агенттиги 1999-жылы калкты жумуш менен камсыз кылуу, орто жана чакан ишкерликти колдоо жана ишсиз жарандарга жардам берүү максатында ачылган. (ErN)
