Бишкек-Ош автоунаа жолунун 225-чакырымында (Чычкан капчыгайы) кар көчкү жүрүп, жол убактылуу жабылды. Бул тууралуу Өзгөчө кырдаалдар министрлигинен кабарлашты.
Көчкү бүгүн түш ченде, саат 12:00дөн өткөндө жүргөн. Көлөмү болжол менен 1200 метр куб деп саналууда. Жолду тазалоого №23 жолду тейлөө ишканасынын эки жүктөгүчү, бир грейдери жана бир “Хово” үлгүсүндөгү автоунаасы тартылып, кар тазаланып жатат. Алдын ала маалымат боюнча жабыркагандар жок.
Министрликтен кабарлашкандай, Бишкек-Ош унаа жолунда кар көчкү түшкөнүнө байланыштуу "Арал" постунда саат 12:00дөн тартып автоунаанын бардык түрүнө убактылуу чектөө киргизилди. Кошумча маалымат берилет. (ErN)
