Иранда мурдагы президент Махмуд Ахмединежаддын жакын саясий өнөгү, мурдагы вице-президент Эсфандиар Рахим Машаи кармалды. Бул тууралуу Тегерандын прокурорунун сайты кабарлады. Маалыматка караганда, Машаини соттун чечиминин негизинде полиция кармады. Мындан башка кененирээк маалымат берилген жок.
Эсфандиар Рахим Машаи 2009-жылы Махмуд Ахмединежад экинчи жолу президенттикке шайланган соң вице-президенттик кызматты ээлеген.
Машаи 15-мартта тараган видео тасмадан кийин кармалды. Анда Машаи дагы бир мурдагы вице-президент Хамид Багаинин кармалышына каршы Британиянын Тегерандагы элчилигинин алдында өткөн акцияга катышып жүргөнүн көрүүгө болот.
Махмуд Ахмединежад президент болуп турган учурда вице-президенттикти аркалаган Хамид Багаи былтыр коррупцияга шектелип камакка алынган эле.