Жогорку Кеңештеги КСДП фракциясында бүгүн кезексиз жыйын пландалды. Бул тууралуу “Азаттыкка” фракция мүчөсү, депутат Аида Касымалиева билдирди.
Анын айтымында, күн тартибинде бир гана маселе – Кыргызстан социал-демократтар партиясынын жыйынына даярдык көрүү каралат. «Жыйын дайындалды, бирок биз азыр шайлоочулар менен жолугуп аймактарда иштеп жатабыз», - дейт Касымалиева.
Өткөн аптада Жогорку Кеңеште кабыл алынган токтомго ылайык, 19-23-мартта депутаттар жер-жерлерде эл менен жолугушууларды өткөрүшөт.
Буга чейин маалымдалгандай, КСДПнын жыйыны 31-мартка белгиленген. Анда Алмазбек Атамбаевди партия төрагасы кылып бекитүү маселеси каралат. (BK)
