Жалал-Абад шаардык соту беш жашар кызды зордуктоого шектүү адамды 20-мартта 20 жылга күчөтүлгөн тартиптеги абакка кести. Бул тууралуу Башкы прокуратуранын басма сөз кызматы билдирди.
Окуя былтыр күзүндө Жалал-Абад шаарында болгон. 2017-жылы 15-ноябрда наристенин энеси белгисиз адам анын беш жашар кызын уурдап, жыныстык ыдык көрсөткөнүн айтып, милицияга кайрылган.
Факты боюнча Кылмыш-жаза кодексинин 129-беренесинин төртүнчү бөлүгү менен кылмыш иши козголгон. Соттук-медициналык жана соттук биологиялык экспертиза наристенин зордукталганын аныктаган.
Тергөөдө зөөкүрдүккө шектүү катары кармалган адамдын күнөөсү толук далилденип, быйыл январда прокуратура ишти сотко өткөрүп берген.