Быйылкы жылдын 1-мартына карата алынган маалымат боюнча, Кыргызстанда жалпысынан 168 чет элдик жаран "качкын" макамын алып, жашап жатат.
Бул тууралуу өкмөткө караштуу Мамлекеттик миграция кызматынын Качкындар менен иштөө бөлүмүнүн башчысы Гүлайда Орозалиева "Азаттыкка" билдирди.
Анын айтымында, качкындардын 87си Сириядан, 61и Ооганстандан, 15и Украинадан келген. Мындан тышкары Каракалпакстандан үч жаран өтүнмө берген.
2011-жылдын мартында башталган Сириядагы жарандык согуш 400 миңдей кишинин өмүрүн кыйды. Уруш качкындар кризисине алып келип, 5 миллиондой сириялык жан сактап башка өлкөлөргө агылган.
