Бишкек Жылуулук электр борборундагы аварияны иликтеген депутаттык комиссия ишин жыйынтыктап, корутундунун долбоорун даяр болгонун комиссия мүчөсү, Жогорку Кеңештин депутаты Улан Примов "Азаттыкка" билдирди. Анын сөзүнө караганда, долбоорго алымча-кошумчалар киргизилет. Анда Бишкек ЖЭБиндеги абалга айыптуу аткаминерлердин аттары аталып, алардын жоопкерчилиги боюнча ишине укуктук баа берүү талап кылынат.
Быйыл 26-январда Бишкек Жылуулук электр борборунда авария болуп, -20 градустан ашкан катуу суукта абоненттерге беш күн бою жылуулук берилген эмес.
Бул кырдаал жарым жыл мурун модернизацияланган Жылуулук электр борборуна карата сын-пикирлерди күчөтүп, Кытай берген 386 миллион доллардын максаттуу сарпталганы суроо жараткан.
Авария боюнча Кылмыш-жаза кодексинин 316-беренеси ("Шалаакылык") менен кылмыш иши козголгон. Февралда түзүлгөн депутаттык комиссия авариянын чоо-жайы менен катар модернизацияга кеткен Кытай насыясын да иликтеп жатат. (EBM/ZKo)
