Европадагы Коопсуздук жана Кызматташтык Уюмунун баш катчысы Томас Гремингер Бишкекке иш сапары менен келет. Бул тууралуу Тышкы иштер министрлигинин басма сөз кызматы кабарлады.
Бейшемби күнү министрдин биринчи орун басары Динара Кемелова уюмдун Бишкектеги борборунун директору Марсел Пешко менен жолугуп, эки тараптуу кызматташтыкты, аймактагы коопсуздукту талкуулады.
Баш катчы Бишкекке май айында келери айтылды.
ЕККУ - дүйнөдөгү коопсуздук жаатында иш алып барган эң ири аймактык уюм. Ага 57 өлкө кирет. Кыргызстан 1992-жылы кошулган. Бишкекте 1998-жылы ачылган анын борбору 2017-жылы макамын өзгөртүп, учурда программалык кеңсе катары ишмердик жүргүзүп келе жатат. (RK)
