Эстрада ырчысы Айжан Газиева премьер-министр Мухаммедкалый Абылгазиевдин кызы эмес. Бул тууралуу өкмөттүн маалыматтык саясат бөлүмүнүн башчысы Чынгыз Эсенгул уулу "Фейсбук" баракчасына жазды. Анын айтымында, ырчы өкмөт башчынын бир тууган агасынын кызы.
- "Ырчы Айжан Газиева премьер-министр Мухаммедкалый Абылгазиевдин кызы" деп айтылып жүрөт, бул чындыкка дал келбей турган маалымат. Айжан Газиева өкмөт башчынын бир тууган агасынын кызы.
Буга чейин айрым маалымат булактар Газиева премьер-министр Абылгазиевдин кызы экенин жана анын энеси менен ажырашканына көп болгонун жазышкан.
20-апрелде өкмөт башчылык кызматка Мухаммедкалый Абылгазиев дайындалган. Анын талапкерлигин Жогорку Кеңеш жактырып, мамлекет башчы жарлык чыгарды. Абылгазиев кызматты аткарууга 21-апрелде киришти. (КЕ)
