Жол кыймылынын дүйнөлүк жумалыгына карата Бишкек шаарында “Бул менин көчөм” аттуу балдар акциясы өтөт. Бул тууралуу иш-чараны уюштуруп жаткан “Жол коопсуздугу” коомдук уюму кабарлады.
Акциянын алкагында бирикменин мүчөлөрү, Бишкек мэриясына караштуу билим берүү башкармалыгынын кызматкерлери жана №66 мектеп-гимназиянын окуучулары жолдогу, көчөлөрдөгү коопсуздукту жана балдардын укуктарын талкуулашат. Ошондой эле ырчылар жана жол коопсуздугун тескеген жаш инспекторлор өнөрлөрүн көрсөтүшөт.
Иш-чарада көчөдөгү балдардын коопсуздугу боюнча мыйзамдарга өзгөртүү киргизүүнү талап кылган петицияга кол топтолот. Петиция Бириккен Улуттар Уюмуна жөнөтүлөт.
“Жол коопсуздугу” коомдук уюму билдиргендей, мындай иш-чара бул аптада дүйнөнүн бир катар өлкөлөрүндө өтөт. (ErN)
