Түндүк Кореянын маалымат каражаттары Сирия президенти Башар Асад Пхеньянга келип, Ким Чен Ын менен жолуккусу келип жатканын кабарлоодо.
Мамлекеттик KCNA агенттиги Асад мындай ынтызарлыгын 30-майда Дамаскта Түндүк Кореянын элчисинен ишеним грамотасын алып жатканда билдиргенин маалымдады.
Асад "Түндүк Кореяга барып, Ким Чен Ын менен жолукканы жатам" деп айтканы менен, сапары кайсы күнгө белгиленгенин тактаган эмес.
Пхеньян менен Дамаск дурус мамиледе. Буга чейин Улуттар Уюмунун байкоочулары согуш жүрүш жаткан Сирияга химиялык курал сатты деп Түндүк Кореяны айыптап келишкен.
Асаддын жарыясы 12-июнда АКШ жана Түндүк Корея лидерлери Сингапурда жолугаардын алдында жасалды.
