Ноокат районунун Кыргыз-Ата айыл округунда бүгүн кечке жуук өлчөмү орточо курут менен тең мөндүр жаады. Бул тууралуу ушул айыл аймагына кошулган Ак-Булак кыштагынын тургуну Гапар Мукуш уулу "Азаттыкка" билдирди.
Анын айтымында, мөндүр бир нече айылдарда дээрлик 20 мүнөттөй жаап турду. Анын кесепетинен аймактагы алма-өрүктөр күбүлүп калган. Бир нече адамдар башы-көзүнө мөндүр тийип, жабыр тартты. Мындан сырткары, үй-жайлардын чатырларындагы шыйпырлар сынды.
Жергиликтүү бийлик өкүлдөрү жана Өзгөчө кырдаалдар министрлиги аймактагы табигый көрүнүштөн жабыр тарткандар тууралуу расмий маалымат тарата элек.
Өзгөчө кырдаалдар министрлиги буга чейин, 5-июнда туруксуз аба ырайы күтүлөрүн айтып, билдирүү тараткан. Анда көпчүлүк аймактарда мезгил-мезгили менен жаан жаап, күн күркүрөшү, бийик тоолуу райондордо кар жаашы, тоо этектеринде жана тоолуу райондордо жаан-чачын катуу жаашы ыктымал экендиги айтылган. 5-июнда күтүлүп жаткан нөшөрлүү жаан-чачынга байланыштуу республиканын сел коркунучу бар райондорунда сел жүрүшү мүмкүн экени эскертилген. (ErN)
