Линктер

шейшемби, 17-июль, 2018 Бишкек убактысы 07:52

Иштамберди кенин иштетүүгө каршы чыккандар өкмөт башчы менен жолугат


12-июнда Иштамбердиде митингге чыккандар. Сүрөт социалдык тармактарга коюлган видеодон алынган.

Ала-Букада Иштамберди кенин иштетүүгө каршы чыккан Кызыл-Токой, Терек-Сай айылынын тургундары бүгүн Бишкекте премьер-министр Мухаммедкалый Абылгазиев менен жолугат. Бул тууралуу нааразы болгондордун өкүлү Мирлан Мырзаев “Азаттыкка” билдирди.

Активисттин айтымында, райондон келген беш адам арыз-муңун жана талаптарын өкмөткө бетме-бет олтуруп жеткирет:

- Биринчиден, Ала-Букада болуп жаткан нааразылыктардын, окуялардын чын-төгүнүн өкмөткө ачык айтабыз. Анткени ал жакта болгон нерселерди ар кандай бурмалап жатышат. Экинчиден, өкмөт башчыга Ала-Букадагы элдин талаптарын жеткиребиз. Биз негизинен алтын өндүрүүдө завод цианид колдонбошун жана калдык сактоочу жайын жаңыдан жасалышын талап кылабыз. Үчүнчү талап - ошол жерде иштегендерге компаниянын мамилеси боюнча. Биз мындан сырткары премьер-министрге "митингге чыккан балдарга карата милиция катаал мамиле кылбасын, кыйнабасын" деген маселени коёбуз, - деди Мирлан Мырзаев.

Жалал-Абад облусундагы Ала-Бука - Чаткал жолундагы Иштамберди кенин иштетүүгө каршы жергиликтүү тургундар 12-июнда митингге чыккан. 200-300дөй адам ишкана мыйзамсыз иштеп жатканын белгилеп, экологиялык зыянды текшерүүнү жана элге компенсация төлөп берүүнү, зыяндуу заттарды колдонууга тыюу салууну, калдыктарды башка жакка чыгарууну талап кылышкан. Эртеси, 13-июнда алар менен өкмөт өкүлдөрү жолуккан.

Буга байланыштуу митингге чыккан 18 адамды 15-июнда милиция Жалал-Абад шаарына облустук ички иштер башкармалыгына алып кеткен. Кечээ, 17-июнда болсо аларга түшүндүрүү иштери жүргүзүлгөндөн кийин, кайра кое берилген.

Иштамберди алтын кенин кытайлык инвесторлорго таандык “Фулд Голд Майнинг” фирмасы иштетет жана анда 600дөй адам иштейт. (ErN)

Сиздин пикир

пикирлерди көрсөт

XS
SM
MD
LG