Кабул Дүйшөмбүгө төрт тажик жаранын өткөрүп берди. Алар Тажикстандын коргоо министринин мурдагы орун басары Абдухалим Назарзоданын тарапташтары. Бул тууралуу 27-июнда Ооганстандын Улуттук коопсуздук боюнча кеңешинин расмий өкүлү Кохир Шох билдирди.
Анын айтымында, төртөө тең генерал Абдухалим Назарзоданын 2015-жылы сентябрдагы козголоң аракети ишке ашпай калгандан кийин Ооганстандын аймагына өтүп кетишкен. Алар Тажикстандын Дарваз районуна чектеш Бадахшан провинциясындагы Борак деген жерде кармалган.
Азырынча алардын тажик-ооган чек ара аймактарындагы куралдуу топтордун катарына кошулган-кошулбаганы белгисиз.
Маалыматка караганда, Тажикстанга өткөрүлүп берилген жарандардын төртөө тең Тоолуу-Бадахшан автоном облусундагы Ванч районунун тургундары. Алардын экөө болгону 23 жашта.
Тажик бийлиги коргоо министринин мурдагы орун басары Абдухалим Назарзоданы "кылмыштуу топ түзүп, 2015-жылы 4-сентябрда Вахдат шаарындагы ички иштер бөлүмүнө жана Душанбе аэропортундагы блокпостко куралдуу кол салуу уюштурган" деп айыптоодо. Анда Вахдаттын төрт милиция кызматкери жана ИИМдин атайын багыттагы төрт жоокери курман болгон. 2016-жылы августта Тажикстандын башкы прокурору Юсуф Рахмон «Абдухалим Назарзоданын козголоңунда мамлекеттик төңкөрүштүн бардык белгилери болгонун» билдирген.
Генерал Назарзоданын өзү 2015-жылы 16-сентябрда Дүйшөмбүдөн 50 чакырым жерде жайгашкан Ромит капчыгайындагы атайын операциянын жүрүшүндө өлтүрүлгөн. Кол салуу жана атайын операция маалында жалпысынан 52 киши каза болгон.
