Кишиневде өткөн айдагы мэр шайлоонун жыйынтыгын жокко чыгарууга каршы он миңдеген адам катышкан митинг өттү. Жекшембидеги нааразылык акциясын батышчыл, оппозициялык партиялар жана жарандык активисттер уюштурду. Алар бийликти 3-июнда Кишинёв шаарынын мэрин шайлоодо уткан "Ар-намыс жана Чындык" платформасынын лидери Андрей Нэстасенин жеңишин таанууга чакырууда.
Ошондой эле шайлоонун жыйынтыгын жокко чыгарганы үчүн Жогорку соттун судьяларына кылмыш ишин ачууну талап кылышты.
Демонстранттар “Мафия жоголсун!” деп кыйкырып, туура эмес чечим чыгарды деген судьялардын сүрөттөрүн кармап турушту.
Кишинев мэрин шайлоонун 3-июндагы экинчи айлампасында батышчыл талапкер, "Ар-намыс жана Чындык" платформасынын лидери Андрей Нэстасе 52,5 пайыз добуш алып, орусиячыл талапкерди уткан.
Бирок сот 19-июнда шайлоонун жыйынтыгын жокко чыгарып, ага эки талапкер тең добуш берүү күнү элди үгүттөө үчүн социалдык медианы колдонгонун, мыйзам бузганын жүйө келтирген.
Батышчыл талапкердин жеңишинин таанылышын талап кылып, миңдеген демонстранттар шайлоодон бери демонстрацияларды өткөрүп келе жатышат.
Бирок шайлоонун жыйынтыгын жокко чыгарууну 25-июнда Молдованын Жогорку соту да колдогон.
Борбордук шайлоо комиссиясы Жогорку соттун шайлоо жыйынтыгын "жараксыз" деп тапкан чечимин 29-июнда бекиткен.
Кишинев мэрин шайлоонун жыйынтыгы жокко чыгарылышын АКШ жана Евробиримдик да катуу сындаган.
