Орусиянын Кемерово облусунда ондогон кишинин өмүрүн алган “Зимняя вишня” соода борборундагы тилсиз жоону өчүрүү үчүн келген өрт өчүрүү кызматынын биринчи отрядынын башчысы Андрей Бурсин камалды.
Ал "шалаакылык кылган" деп айыпталып жатат. Тергөөнүн жыйынтыгы боюнча, Бурсин окуя болгон жерде чалгындоо жана күчтү колдонуу иштерин жасаган эмес. Буга чейин ал өрт чыккан учурда соода борборунда тосуп алган администрация жетекчилери жок болгонун айткан.
Бурсин өрткө байланыштуу кармалган биринчи өрт өчүрүүчү эмес.
Орусиянын Тергөө комитети “Зимняя вишня" соода борборундагы өрткө байланыштуу Кемерово облусунун чукул кырдаалдар мекемесинин жетекчилигине каршы кылмыш ишин козгогон.
Кырсык 60 кишинин, анын ичинде 41 баланын өмүрүн кыйган. Жетекчилер шалаакылык кылган жана мамлекеттик акчаны максатсыз пайдаланган деп шектелип жатат. Буга чейин соода борборундагы кырсыкка байланыштуу сегиз киши камалган.
