Ош-Бишкек альтернативалык жолун куруп жаткан кытай компаниясын тоногондор кармалды. Бул тууралуу Жалал-Абад облустук милициясынын басма сөз катчысы Мыктыбек Турдубеков “Азаттыкка” кабарлады.
Анын айтымында, 2-июлда Тогуз-Торо районунун Көк-Ийрим айылында жол куруп жаткан кытайлык компаниянын жумушчусун белгисиз бирөөлөр сабап, 1 тоннага жакын күйүүчү майды тоноп кеткен. Натыйжада Кытай жараны жарадар болуп Тогуз-Торо райондук ооруканасына кайрылган. “Тоноо” беренеси боюнча кылмыш иши козголуп, ыкчам иликтөө иштеринин натыйжасында шектүү катары төрт киши кармалды. Алардын бири - айылдык кеңештин депутаты.
Учурда кылмышка шектүүлөр үй камагына чыгарылды. (BkA)
