Кыргыз өкмөтү Райымбек Матраимов боюнча соттун чечимин азырынча колуна ала элек. Чечим келип түшкөндөн кийин ал карала тургандыгын бүгүн “Азаттыкка” өкмөттүн басма сөз катчысы Чыңгыз Эсенгулов билдирди:
- Бишкек шаарынын Биринчи май райондук сотунун Райымбек Матраимовго карата чечими учурда Кыргыз Республикасынын өкмөтүнүн аппаратына келип түшө элек. Келип түшөрү менен ал каралат. Алдыда дагы кийинки инстанциялар бар.
Бүгүн Бишкектин Биринчи май райондук соту Райымбек Матраимовго Мамлекеттик бажы кызматынын төрагасынын орун басарынын кызматына кайра кайтууга уруксат берген чечим чыгарды.
Эл ичинде "Раим миллион" атыккан Райымбек Матраимов 2017-жылдын 23-ноябрында Мамлекеттик бажы кызматынын төрагасынын орун басарынын кызматынан бошотулган. Өкмөт бул чечимди "анын иши жетекчиликтин чечимдерине жана жүргүзгөн саясатка каршы келет" деп негиздеген.
Быйыл апрелде ал "мени негизсиз жумуштан алды" деп өкмөттү сотко берген жана ал кездеги премьер-министр Сапар Исаковдун буйругун жокко чыгарууну өтүнгөн.
Мыйзам боюнча, райондук чечим акыркы деп эсептелбейт. Тараптар ага каршы шаардык жана Жогорку сотко арызданууга укугу бар.
