Бишкектеги Жугуштуу илдеттер боюнча республикалык оорукананын реанимациясында учурда үч наристе оор абалда жатат. Бул тууралуу 26-июлда “Азаттыкка” башкы дарыгер Гүлжигит Алиев билдирди.
Анын айтымында, жайкысын ичеги-карын ооруларына чалдыккандар көбөйдү.
- Бир күндө 270-300 адам келип жатат. Орун жетиштүү, батпагандарын коридорго жаткырып жатабыз. Негизинен ичеги-карын инфекциясына чалдыккандар. Оор абалда келгендери да бар. Азыр үч бала реанимацияда. Абалы оор. Бирөө жасалма дем алдыруу аппаратында, - деди Гүлжигит Алиев.
Дарыгерлер жайкысын мөмө-жемишти жууп жеш керек экенин, жеке гигиена эрежелерин так сактоо зарылдыгын эскертип жатышат. (BCh)