Өзбекстан менен Тажикстан биргелешип Зарафшан дарыясынын боюна 320 мегаваттык эки гидроэлектр станция курушат. Бул тууралуу 17-августта эки өлкө президенти Ташкентте чогуу өткөргөн басма сөз жыйында Өзбекстандын мамлекет башчысы Шавкат Мирзиёев айтты. Өкмөт аралык комиссия Сарез көлүн ичүүчү суу катары колдонуу маселеси да талкууланып жатканын кошумчалады.
- Аймактык өнөктөштүктө гидротехникалык курулуш олуттуу маселе. Бир аз убакыт өтөт, биз биргеликте куруп, көйгөйлөрдү чогуу чечебиз,- деди Мирзиёев.
Тажикстандын президенти Эмомали Рахмон 17-августта Өзбекстанга эки күндүк мамлекеттик сапар менен келди. Жолугушуунун жүрүшүндө эки мамлекет ортосундагы стратегиялык келишимге кол коюлду.
