Бүгүн Чолпон-Атада КМШ мамлекеттеринин коопсуздук күчтөрүнүн «Ысык-Көл – Антитеррор-2018» машыгуулары жыйынтыкталат. Эки күнгө созулган бул машыгууларга жалпы эки миңге жакын аскер кызматкери, 400дөй техника катышты. Орусиядан алынып келинген “Искандер-М” ыкчам-тактикалык комплекси сыноодон өткөрүлдү.
Машыгууларда негизги аракеттерди Орусия менен Кыргызстандын аскерлери көрсөттү. Иш-чарада алардан сырткары Армения, Беларус, Казакстан, Тажикстан жана Өзбекстандын күч кызматтарынын өкүлдөрү катышты.
КМШга мүчө мамлекеттердин компоненттүү органдарынын биргелешкен терроризмге каршы машыгуулары Кыргызстанда үчүнчү жолу өтүп жатат. Буга чейин 2001-жылы Ош шаарында, 2013-жылы Бишкек шаарында өткөн. (ErN)