Казакстандын Өзбекстандагы элчиси Ерик Утембаев өзгөчө ири өлчөмдө акча уурдаган деп шек саналууда. Бул тууралуу 16-октябрда Казакстандын Мамлекеттик кызмат жана коррупцияга каршы күрөш агенттигинин өкүлү Жанна Бастарова билдирди.
- Ал жооптуу кызматты ээлеп туруп, Казакстандын Өзбекстандагы элчилигинин курулушунда аткарылган иштер тууралуу атайын жалган актыга кол койгон деп шек саналууда. Анын мыйзамсыз иш-аракеттеринин зыяны 140 миллион теңгеден (25,2 млн. сом – ред.) ашкан, - деди Бастарова.
Казакстандын Тышкы иштер министрлиги маалыматты ырастады. Бул иш министрликтин мурдагы жооптуу катчысы Анарбек Карашевдин чоң өлчөмдө пара менен кармалышына байланыштуу экени айтылууда.
