Бишкекте залкар артисттер Муратбек Рыскуловдун 110, Сабира Күмүшалиеванын 100 жана режиссер, актер Искендер Рыскуловдун чыгармачылыгынын 60 жылдыгына арналган спектакль коюлат. Маданият, маалымат жана туризм министрлиги кабарлагандай, спектакль 31-октябрда Чыңгыз Айтматов атындагы орус драма театрында болот.
Үч таланттын ишмердигине арналган спектакль "Улуу даражалуу актер" деп аталат. Каалоочулар акысыз кирип көрөт.
Муратбек Рыскулов - СССР эл артисти, Кыргыз ССРинин Токтогул атындагы мамлекеттик сыйлыгынын ээси. Айрым маалыматтарда 1899-жылы, кээ бир документтерде 1908-жылы төрөлгөнү жазылган. 1974-жылы дүйнөдөн кайткан.
Сабира Күмүшалиева - Кыргыз ССРинин маданиятына эмгек сиңирген артист, Кыргыз Республикасынын эл артисти жана Эл баатыры. 1917-жылы жарыкка келип, 2007-жылы көз жумган.
Эки залкардын уулу, Кыргыз эл артисти Искендер Рыскулов кино актеру жана режиссер катары белгилүү. 1941-жылы жарык дүйнөгө келип, 2002-жылы дүйнөдөн кайткан.
