17-18-ноябрда Жумгал районунун Байзак айылында эркин күрөш боюнча өспүрүмдөр арасында республикалык мелдеш өтөт. Мелдештин уюштуруучусу, "Дордо Байзак" балдар-уландар спорт мектебинин директору Качыбек Жээнкадыровдун "Азаттыкка" билдиргенине караганда турнир Байзак баатырдын элесине арналып, быйыл 5-жолу өткөрүлүп жатат.
Байгелер 14-15 жаштагы балдар арасында 13 салмакта (23 кг. - 58 кг.), 16-17 жаштагы кыздар арасында жети салмакта (23 кг. - 64 кг.) ойнотулат. Турнирге катышуу үчүн Кыргызстандын бардык аймактарындагы жана Казакстан менен Өзбекстандын айрым спорт мектептерине чакыруу жөнөтүлгөн. Мелдешке болжол менен 300гө жакын жаш балбан катышары күтүлүүдө.
Турнирди өткөрүүгө жергиликтүү көмүр кендерин иштеткен ишканалар жана айыл өкмөт каражат бөлүүгө убада кылган.
- Байзак баатырдын элесине арналган эркин күрөш боюнча турнир алгач 1989-жылы өткөрүлгөн. Андан соң менин шакирттерим республикалык мелдештерди утуп, Азия чемпионатынан байге алып келе баштаганда бул турнирди кайрадан уланттык. 2010-жылдан 2012-жылга чейин үч жыл катары менен республикалык мелдеш өткөрүп, Кыргызстандын бардык аймактарынан 300дөн ашуун өспүрүм келип, мелдеш жогорку деңгээлде өткөн. Ошол салтты быйыл дагы кайра улантууну туура көрдүк. Мелдешти өткөрүүгө "Демилге", "Шарбон", "Кыргыз көмүр" өңдүү көмүр иштеткен ишканалар, айыл өкмөтү жана башка бир катар демөөрчүлөр колдоо көрсөтүп жатат, - деди Жээнкадыров. (ECh)
